Biz Azərbaycanın sosial-iqtisadi inkişafını bilavasitə
sahibkarlıqla, onun inkişafı ilə bağlayırıq!
Çiçəklənən Abşeron layihəsi Novxanıda28.06.2020
Çiçəklənən Abşeron layihəsi Novxanıda

“Çiçəklənən Abşeron” layihəsi Bakının daha bir kəndini çiçəkləndirib.

Xatırladaq ki, Kiçik və Orta Biznesin İnkişafı Agentliyinin dəstəyi ilə “Biznesin İnkişafında Rahat və Güvənli Əməkdaşlıq” və “Bakı Abadlıq Xidməti” birlikdə faydalı, uğurlu və maraq doğuracaq layihəyə imza atmışdır.

Bu layihə çərçivəsində Balaxanı və Zirə qəsəbələrinin ardınca Bakının Novxanı kəndində yaşayan 300-ə yaxın ailənin hər birinə 250-1000 ədəd arası əsasən lavanda, bibəriyyə və digər müxtəlif bitkilər paylanılır. Həmin bitkilər 6-12 ay ərzində geri alınıb yeniləri ilə əvəz olunacaq, həmçinin, paylanılan saya uyğun ailələrə 80, 150 və 250 manat dəyərində xidmət haqqı veriləcəkdir.

“Çiçəklənən Abşeron” layihəsinin bir çox üstün meyarları vardır. İlk öncə “COVİD-19” virus ilə bağlı mövcud karantin rejimində ailələr öz həyətyanı sahələrində evlərini tərk etmədən bitkiləri yetişdirməklə əlavə gəlir əldə edir və ailə büdcələrinə dəstək olurlar. Buda öz növbəsində özünüməşğulluq proqramı çərçivəsində aztəminatlı ailələrin təsərrüfatlarına dəstək olaraq əlavə gəlir əldə etməsinə müsbət töhvə verməkdədir. Eyni zamanda, becərilən bitkilərin abadlıq işlərində istifadəsi ilə yanaşı sonrakı mərhələdə kosmetik və farmaseptik məhsulların, yağların istehsalında istifadə olunacağını nəzərə alaraq, kənd təsərrüfatı emalının inkişafına da müsbət töhvə verəcəyi gözlənilir.

Ümumilikdə, bu ilin əvvəlindən reallaşdırılan “Çiçəklənən Abşeron” layihəsi çərçivəsində Balaxanı, Zirə və Novxanı qəsəbələrində yaşayan 800-ə yaxın aztəminatlı ailəyə 200 minə yaxın müxtəlif bitkilərin verilməsi nəzərdə tutulub.

Qeyd edək ki, "Çiçəklənən Abşeron" layihəsi növbəti mərhələdə Ramana və Şüvəlan qəsəbələrində həyata keçiriləcəyi planlaşdırılıb.